LA BOH D'EHTREMAURA
LA LUENGA EHTREMEÑA
Nesecitamuh tenel una Luenga a la ora d´ehpresalmuh, y comu la parabra eh elimentu cohtitutibu del luenguahi, pa conserbal-la en su pelitahqui rehional ae que dotal a Ehtremaúra d´una Acaemia de la Luenga Ehtremeña y d´un iciunariu (que ae en borraol), y Gramática que ya tieni. Pa qu´Ehtremaúra puea afianzal su presonaliá, tiini que cudial su Luenga y no ehal-la abandona a la su suerti.
Lo mehmu que hidierun Galicia, Bahconia, Cataluña y cuantah rehionih quisierun tenel una ientia propia, ya qu´el idioma eh la esencia de muehtra bía, sin el o adulteranduli y mehclánduli con otrah luengah que no tiinin na que bel con´a qu´emuh bebiu de huentih ehtremeñah, eh difici hadil ehtaú. Eh combenienti efichal cuantu antih lah normah de la Luenga ehtremeña, polqu´el habla de cualquiel puebru o nación, le da ehpecial y particulal presonaliá.
En muehtra Luenga ae muchuh términuh que no se leh conodi su oríhin. Puein sel rehtuh d´otrah luengah ya desapaecíah, qu´oy se topan en´a barieá Luengüihtíca que llamamuh “ Habla Ehtremeña “, o en´ah moaliaih de Grabie y Galán y Chamizu que consieramuh comu suh mayorih representantih. Dece ehti umildi perioicu intentaremuh de sacial el hambri de muehtra Luenga, y sobri to a la tercel probincia o ehtremeñuh de la diáhpora; sea poh pol Ehtremaúra.
Biembenio
DESATINU EN´A CERCA
Deci hadi tiempu la pogresía depreaora, se deica a cambial y sembral loh cahcuh ehtoricuh de lah ciuaih sean ono patrimoñiu de la umania, d´edificiuh moelnihtah, acrihtalauh, d´ormigón o hierru, con el negatibu impahtu bisual. S´ebería de ponel cotu a tantu atropellu patrimoñial que s´ehtá cometiendu tantu a´ndal nacional comu rehional, polqu´en pocu tiempu s´a cometiu máh farrungamientu qu´en el trahcursu de la epuca de loh barbaruh ahta la ahtualia.
En cuantu al desatinu que s´ehta cometiendu en´a cerca ( muralla ), con la cohtrución del Otel Atriu en´a praza de San Mateu, no s´ebería d´abel autorizau su cohtrución, pol el dañu que se pue ocasional a loh edificiuh de loh alreorih, ya qu´al tenel pocuh cimientuh y ehtal montauh sobri roca, puen sufril dañuh inreparablih. La cerca pue rebitalizalsi sin neseciá de tocal ni una piedra ehteriol de loh edificiuh, rehormandu el interiol rehpetandu tou lo posibli.
En Cázrih áy barriuh moelnuh pa hadel ehprimentuh, comu el nuebu centru de saluh del Nuebu Cázrih, el edificiu del Inen en´a Abenía de la Ihpanía y a güen seguru se hadra lo mehmu con la rehorma del Auditoriu, y to ehtu con la oposición de la mayol parti de la ciuáania; pol lo tantu no s´eberían de dal máh autorizaciónih pol parti de lah Autoriaih, pa cometel máh barbariaih comu lah que s´ehtan cometiendu. Si al trahbási, peru a lah tierrinah sequinah d´Ehtremaura.
Biembenio.
ENCEMENTAL EL CAMPU
En éhti mundu ahtual, úrtimaenti s´ehtan pusiendu lah cosah al rebeh, endi que loh bibiorih del cambiu climaticu an encetau a debulgal qu´el clima ehta cambiandu, ca cual aprobecha pa idil y hadel lo que le bieni en gana, unuh amenazandu y metiendunuh mieu pol enteresih políticuh, otruh pol enteresih económicuh comu esi caraura del demúcrata ehtauniensi Argol, que palra muchu de cambiu climaticu y sin embalgu eh unu de loh que máh contaminan, peru el, enga amasal que te amasal cuartuh.
E´nah primerah elecionih demucraticah moh prometierun un mundu felici, con esuh cartelih onde se representaban zonah berdih y ahardínah pol doquiel con muchah florih, s´encetarun a repoblal bariah zonah de la rehión con árbulih autohtonuh, peru to esu a queau aparcau. Oy en Ehtremaúra moh lo pintan negru sigún argunah declaraciónih, se repuebla pocu, s´a sembrau el campu de placah solarih, se cohtruira la refinería con suh correhpondientih centralih térmicah, que queramuhlu o no contaminan bisualenti y al meyu ambienti, y pol si huera pocu, aora bieni muehtru menihtru ehtremeñu de fomentu y moh idi que ba a sacal una ley pa legalizal lah cadah de campu, eh idil pa encemental el campu.
Si queremuh qu´Ehtremaúra sea un paraisu natura ae que protehel el campu, qu´eh pol onde muehtru gobiernu regional a´pohtau siempri pol el turihmu natura com´unu de loh primeruh meyuh económicuh de la rehión. No se puei autorizal que se cohtruya pol doquiel, s´eberían declaral unah zonah no mu apartah de lah pobracionih, declarándolah parcelah d´ociu o güertuh hamiliarih a un preciu asequibli y asín ebital lah cohtrucionih ilegalih.
Biembenio.
BIBIL CON´A BASURA
Ürtimaenti s´ehta palrandu muchu con motibu del cierri o no de la central nucleal de Garoña ( Burgoh ), y de rehpahillón de la central nucleal d´Almarah ( Cazrih ), asín comu de lah enerhiah renobablih. En cuantu a la Central de Garoña, eh cosa de Burgoh y del ehtau , unu sabra loh derechuh economicuh que pierdi y el otru loh compromisuh pulitícuh qu´aya contraiu com partiuh pulitícuh antinuclearih y grupuh ecolohihtah.
Ehtremaúra tieni doh ocionih, una que la Hunta presioni pa que a la beh que la central de Garoña se cierri, cierral la d´Almarah, o acontinal unuh añuh en funcionamientu si lah condiciónih lo premitin meianti una empeción d´ehpertuh, y siempri y cuandu qu´el empuehtu d´ubicación rebielta a Ehtremaúra, y no al Paíh Bahku comu ocurri en´a ahtualiá, con el empuehtu de la central se cubriría el presupuehtu de la rehión, pasau ehti tiempu ebería cierralsi.
En cuantu a lah enerhiah renobablih ni son tan saluablih ni son tan sohteniblih, loh molinilluh y lah placah solarih tamien contaminan tantu bisual comu ecolohica, poh dañan la bisual del paisahi y ayuan a proucil efehtu embernaeru, proucin cuatru kilubatiuh y encima loh consumiorih tienin que pagal lah subención d´ehtah enerhiah.
Toh sabemuh qu´el pogresu tray bienehtal, peru tamien tray contaminación, pol lo tantu tenemuh que bibil con´a basura.
Biembenio.
DÍA DE LA PALRA DE SERRAÍLLA
Con motibu de bel anunciau en un pamfletu de qu´el día dieciseih daohtu pasau, se celebraba en la localia de Serraílla el Día de la Palra de Serraílla ( II Edición ), me dio muchia alegría y a partil d´entocih ahta qu´enllego el día, loh contaba ahta qu´al amén enllegó el día indicau, no due en dehplazalmi a esa localiá, duranti orah ehtubi acompañandu a la charanga y a to esi arrehuntamientu de serraíllanuh comu, ombrih, muherih, mayorih, dagalih y dagalinuh, bailandu pasooblih deleitauh pol la charanga, siempri en compaña d´Eduardu el panaeru unu de loh organizaorih d´ehti ebentu enhamáh m´e sentiu máh auhtu al il en compaña de hentih que tienin en común esa gran Luenga qu´eh el Ehtremeñu, y to ehtu a pesal de no conodel a naide.
Me hui dece Miahá p´acompañal en ehti ahtu de efensa de la Palra de Serraílla qu´eh lo mehmu que idil Ehtremeñu, cahtúu o lo que queramuh llamal-lu, yo m´inclinu pol lo primeru pol que lo lohicu eh qu´enllebi el nombri de la rehión.Tamien hui pa copial ehti ebentu y trahlaal-lu al mi puebru y que de hechu ya lo ehtamuh encarrilandu, pa celebral-lu el añu que bieni y de pasu a la beh, recuperal esa ropa qu´antañu bihtian loh muehtruh agüeluh, comu parti de la curtura ehtremeña y que farta hadi en ehtuh tiempuh del hih, hoh y el rah.
En ehtuh tiempuh en qu´el Ehtremeñu eh una Luenga acorralá, arrinconá y dehpreciá, en tobia ae enclabih del norti de Cazri comu Serraílla, Garrobillah d´Alconeta, Torrohoncillu, gata y muchiuh puebruh máh, tenemuh que mobilizalmuh, runchal y trabahal con esuh cacharrinuh que cerculan pol esah antobiah embisiblih y que hundean lah noticiah a milih de kilometruh en un momentu, encrusu perdel de muehtru tiempu y perrinah comu hadi Eduardu y comu hagu yo; pol qu´enque lah heneracionih d´ahora no ehtan pol la su recuperación, lah benierah moh puen piil cuentah. Agraecel a toh loh serraíllanuh su apoyu a la muehtra quería Luenga, y sobri to a esi arrehuntamientu de pesonah, muherih, ombrih, dagalih y dagalinuh que graciah a elluh se celebra pol segundu añu consecutibu, el día de la Palra de Serraílla.
Toh loh puebruh d´Ehtremaúra eberían tomal el ehemplu de Serraílla, ponelsi manuh a la obra y meianti ahtuh comu el dehcritu antiriolmenti, rebindical muehtra Luenga ahta qu´entri toh, la emllebemuh a que se imparta en loh colehiuh y no desapaeza, comu a ocurriu con otrah muchiah que pol no abelsi efendiu, s´encuentran en loh museuh.
Peru a pesal de toa ehta barbarie, abandonu y desidia cometia con la Luenga Ehtremeña, graciah a la muchia henti comu Eduardu, L´asociación Curtural Pablu Gonzálbih de Miahá y muchiuh ehcribiorih, puetah y demáh henti del puebru, asina comu la concehala Maxi d´Ehtremaúra Unia y miembru de la antiriol asociación, qu´a presentau unah propuehtah huntu con el parlamentariu autonomicu del mehmu partiu pa encluir al Ehtremeñu en´a nueba reholma del Ehtatutu d´Antonomia, y que comu consecuencia, s´a consiguiu, qu´en su artículu sieti se iga que belará pol loh rahuh de ientiá luengüíhtica que moh definin. “ Enque no se rebindica na máh rehpehtu a otruh ehtatutuh “.
“ Si Argu tieni ehti ehtatutu eh que no se dihcuti con´a Cohtitución: moh ientificamuh con ella. Eh oportunu que la embehtigación dec´el puntu de bihta de la Luenga sea emportanti pa conodel loh orihenih del Ehtremeñu o de la Fala “.A pesal de toah lah reholmah abiah y pol abel, en el tema de la Luenga siempri se quean alicortuh comu si leh diera mieu de ponel "el ehtremeñu es la segundera luenga d´Ehtremaúra". Apohtillal tamien, qu´el partiu políticu y rehionalihta Ehtremaúra Unía, enlleba en loh suh ehtatutuh la recuperación, dibulgación y desarrollu, enllegandu si puiera a colocal-la en´a rehión comu la segunda Luenga.
Biembenio.
LOH SANTUH INOCENTIH
No atermina de abandonal suh prehuiciuh, esa raical y nefahta palti del cini ehpañol que tantu dañu hadi a ehti paíh y pol endi siempri que puei a Ehtremaúra. Esi cini qu´idin loh entendiuh eh renobaol y dinámicu, yo piensu qu´eh un cini subencionau y pocu dinguelau pol la sociea. A ehti cini ebería retirálseli la subención y competil en igualdah de concicionih con el retu. Ehtamuh hartuh d´ehcuchal qu´el cini americanu tieni máh acehtación qu´el ehpañol, eh normal polque eh cini y no esa palti del cini ehpañol qu´eh basura, siendu normal que la henti no lo dingueli.
Ehtaba yo dinguelandu la caha tonta, cuandu al chambal de canal, oserbú que la penicula que s´emitia a continación, se trataba de loh santuh inocentih, roa, en Ehtremaúra y su continiu retrataba una de lah epúcah máh negrah y caciquilih de la ehtoría d´Ehtremaúra. Eran tiempuh duruh, dominauh pol una oligarquia terratenienti ancla en epúca meyebal, la cuala se creía que to le pretenecía.
Ehta oligarquia que tomo máh contahtu con´a Capita del Reinu que con su propia tierra, y que prefirió hundilsi antih que subilsi al carru del pogresu, y traholmal a ehta tierra en una rehión máh prohpera y rica. Tamién careciamuh d´una crasi meya, que contrarrehtará su poel, obligandula a embertil ayuandu al pogresu d´ehta tierra y bienehtal de loh ehtremeñuh. Maluh eran aquelluh tiempuh, peru no máh faborablih son loh ahtualih, a pesal d´entral en´a comunia lah perrinah a raualih d´esuh imnumerablih fonduh uropeuh, peru la mala alminihtración d´esuh fonduh a siu prehuicial pa llebal a Ehtremaúra al lugal de pogresu y bienehtal que le correhpondi.
Pol lo tantu, dinguelemuh el futuru y reheneremuh a ehta tierra, pa ellu tenemuh herramientah, tenemuh ehtatutu, tenemuh elecionih ca cuatru añuh, doh clabih hundamentalih pa chambal a Ehtremaúra, meianti leyih que facilitin y ahilicin la implantación d´induhtriah traholmaorah de muehtruh prouhtuh agrículah y ganaeruh, y qu´ehin palti de la su riqueza henera en´a comunia. Peru tamien no menuh emportanti eh, abandonal esah biehah práticah y tih caiquilih hereauh del pasau, y qu´aun premanecin en palti de la sociea ehtremeña.
Biembenio.
EHTREMAURA TAMIEN TIENI SEH
Deci hadi tiempu ehtá en marcha en´a prensa esi run run anehtesicu, emprendiu pol lah Autoriaih Nacionalih y Ehtremeñah, pa ilmuh preparandu pa cuandu llegui el momentu de hadil el trahbási d´agua del Tahu a la Rehión del lebanti, enque no hadi farta poh ehtamuh toh bien anehtesiauh ya.
Cuandu el Gobiernu d´Ahnal aprebu el trahbási del Ebru al Lebanti, to´l mundu se pusu en pie de guerra, aqui en Ehtremaúra no se muebi naide se haga lo que se haga, amáh el trahbási del Tahu, cuenta con el bihtu güenu de lah doh huerzah mayoritariah de la rehión, y ehque Ehtremaúra a siu deci tiempuh enmemorialih la ermana bahtarda del paíh, aqui esihtin a raualih demaseauh palmeruh y adulaorih del poel, sigún idin lah luengah biperinah en lah charlah de corrilluh o parlamentuh de la trecera eá. Aún oy siguimuh comu siempri siendu lah lebah d´empuhi del ehtau comu: melitarih, Cibileh, policiah y manu d´obra barata.
Ehtremaúra tamien tieni seh, d´aquí no puei salil ni una gota d´agua, solu tieni que salil la que pol Ley le correhpondi pasal a Portugal. En lugal de hadil el trabási, ae que hadil comu se hizun en Nabarra con el Pantanu d´Itoih y el Canal de Nabarra, que deci la zona meya alta ahta el ehtremu sul de la Comuniá, s´abahteci d´agua a máh de la metá de la mehma. L´agua sobranti en Ehtremaúra que no sobra nenguna, se ebería d´atrabéh d´un canal que partiera del Tahu, abahtecel a loh puebruh y a esah tierrinah sequinah del sul de cázrih y Baaho.
Antih de dal l´agua d´Ehtremaúra que no tieni cuasi pa abahtecelsi, se ebería de dal toa esa agua del Riu Ebru que desemboca en la mal, peru claru esu eh harina d´otru cohtal, loh catalánih, mañuh y muchuh adulaorih de loh primeruh, runcharun pol la efensa de l´agua pa que no huera a la zona del Lebanti, peru aquí semuh demaseau desolganizauh y pocu endependientih, y comu ihu muehtru paisanu Francisco de Salas de loh ehtremeñuh en ehtah doh ehtrofah.
Ehpiritu desuniu domina a loh ehtremeñuh
hamáh entran en empeñuh ni quierin tomal partiu.
. . . . . . . .
Y enqu´eh mucha su bibeza
bienin a sel pol pereza loh indioh de la nación.
Biembenio.
PROTEHEL LA DEHESA
En´oh tiempuh prerromanuh, la tierra en Ehtremaúra pretenecía a lah tribuh natibah, s´ehplotaba de holma comuna, peru con´a llegá de loh romanuh y la hundación d´el Condado de Metellínun y pohtiriolmenti la Colonia d´ Emerita Augusta, s´emprincipio la nacencia del latifundiu.
Con la hundación d´Emerita Augusta, moh ocurriu comu en toa la ehtoría moh a ocurriu a loh ehtremeñuh, serbil de lebah al poel ehtableciu, Emerita silbió de plataholma p´acabihal la conquihta pol loh romanuh, del úrtimu reuhtu de la Penísula, concretaenti lah tierrah de loh cantabruh, puebru que s´oponía al emperiu. Con ehtá conquihta, cuandu se licenciaba a loh lehionariuh, se leh hadia un endilgu en entierrina comu recompensa a suh selbiciuh prehtauh, la equibalencia en tierra a lo qu´eh oy una dehesa, y d´ehta holma se protehia el entramau de billah y asentamientuh ruralih creauh pol loh romanuh, y asin controlal a loh natibuh.
Dece hadi muchiu tiempu s´intento y con muchia radón, la repartición de la tierra entri loh ehtremeñuh que no la tubun, peru siempri conduhu al fracasu , y oy a pesal de lah bíah qu´a cohtau el ententu de repartil-la, a siu conselba pa´l bien de Ehtremaúra. El primel ehtremeñu qu´intento repartil el latifundiu, hué Pedro de Valencia qu´ihu “ La tierra se les ha de dar al que no la tuviese “, pohtiriolmenti ahta la intauración de la republica, huerun muchiuh loh ehtremeñuh que lo ententarun peru fracasarun en´l ententu, apalti del timiu Plan Baaho de Colonización del rehimen antiriol. Oy tenemuh un tesoru ecólohicu y natura comu no tieni nenguna comuniá ehpañola, peru la dehesa apalti de su riqueza agricula, ganaera, caza y faunihtica, ebería ehtal máh ehplota pol el turihmu, sin cael en´a depreación.
La dehesa tamién tieni un patrimoñu rura bahtanti emportanti, enque su conselbación tieni muchiu que deseal, tamien tieni una emportantisima redi de biah pecuariah qu´a trabéh d´ehtáh, se poia ehplotal to esi tesoru que tieni la dehesa, y con toa esa riqueza se crearían muchiuh puehtuh de trebahu.
Pol lo tantu Ehtremaúra ebi protehel la dehesa, pol su ecosihtema y cometiu meyuambiental, y pa qu´al menuh lah heneracionih benierah difruten d´ella, y se ehploten suh recursuh naturalih, ya qu´ahta oy no s´a hechu. Tamien s´ebería de declaral a la dehesa patrimoñu de la umanía.
Biembenio.
EL PUETA DEL PUEBRU
El día cincu de Diciembri del añu 2009, l´Asociación Curtural Pablu Gonzálbih de Miahá, hidun un sencillu omenahi al pueta ehtremeñu Francihcu Habiel Feiho, loh sociuh n´abían teniu nengún roci con´l peru desiguia qué se toparun, sulhiu una enolmi complicia.
Trah la presentación del ahtu d´omenahi, pol palti de loh sociuh se le hidun recital de puesiah en su onol, peru el puntu máh álhiu enllegú, cuandu Feiho recitú unah puesíah, y entri ellah una entitula “ La Seña Carmen “, qu´el pueta deicú a su propia mairi; sigún iba recitandula a loh asihtentih leh iba subiendu del ehtómagu acia arriba un holmiguillu que la mayoria no puu aguantal, saltánduselih a máh d´unu arguna qu´otra lagrimina. Toh puierun comprebal en´l pueta, la sencilleh del ombri ehtremeñu, la su balía comu pueta y rasoa, asin comu su tesón en´a debulgación y efensa de la Luenga Ehtremeña. Oy pol oy ehta asociación, crei qu´eh el pueta del Puebru Ehtremeñu, polque suh puesíah rezuman loh sentimientuh de´si puebru.
Biembenio.
EL MANÁ FOTOBOLTAICU
Con´el albenimientu de la demucracía, ehmienzó el auhi de la enduhtria del ladrillu, una enduhtria que plontu sobrepasú a toah lah demáh, el ladrillu era un higanti con´oh pieh de barru peru to el mundu se ehó arrahtral pol él, ciertu eh qu´ubu muchiuh añuh de bienehtal, añuh en que lah crasih umildah enllegarun a bibil tammien comu lah crasih máh puientih, toh pensabamuh qu´ehti higanti nunca se farrungaría a pesal de que toh sabiamuh que tinía loh pieh de barru, peru a pesal del riehgu, siguía y siguía añu trah añu arrollandu a to lo que se le ponía pol alanti, ahta aconllegal al puntu de farrungamientu, ehandu a una gran palti de loh ciuaanuh, unuh en´l paru y otruh en´a ruina, y a toh en un ehtau de pesimihmu y desehperanza. No acabihó de cael el ladrillu, cuandu moh emprincipió a besital otru higanti, ehti el fotoboltaicu, que trah longo tiempu d´ehcarceu y ditih y diretih con´a Hunta d´Ehtremaúra, a consigíu ponel lah suh placah en´ah tierrinah de la Ehtremaúra. Ehta enerhia ehtá bahtanti emplanta en bariah comuniaih antónomah, y a hechu que bariah Audienciah ( Ayuntamientos ), trah perdel loh beneficiuh del ladrillu, leh aya caiu el maná fotoboltaicu, ehti maná leh a beniu bien pa tapal esuh abuheranchuh que máh bien paecin cráterih, hechuh con´l dehpilfarru emnecesariu de muchiuh falsuh selbiciuh. Ehperemuh que no ocurra comu con´a burbuja enmobiliaria; ehti maná bien alminihtrau puei remedial a muchiah Audienciah, bien pa acabihal o reucil suh deuah y dal selbiciuh nesezariuh a suh bidinuh, asín comu lah condiciónih pa la nacencia de puehtuh de trebahu. Peru a güen seguru qu´ehti maná no se ba a aprobechal bien, ya emuh emprincipiau comu con aquel dichu romanu al puebru “ pan y circu “, ae Audienciah que comu no sabin que hadil con tantuh cuartuh, regalan a loh suh bidinuh telebisorih, aguinalduh y angunuh euruh, a partil d´aquí beremuh muchiah carnabalah, polque palti d´ehti maná se utilizará no pal bien de loh ciuaanuh, sino pa que muchiuh pulitícuh acontinen mandandu y si no al tiempu.
Biembenio.
METELMUH FUHCA
Ehtremaúra endi loh tiempuh prerromanuh, a siu y sigui siendu una rehión al selbiciu del poel, primeru se silbierun d´ella loh feniciuh y romanuh de huerzah mercenariah, ehtúh úrtimuh, ebíu a lah sublebaciónih sobri to en´l norti de la probincia de Cazrih, hidierun ehtraguh.La pogresia, siempri a dehpreciau la curtura celtíberica, polque sigún elluh eran mu barbaruh, paece sel que cuertaban lah caezah a suh enemiguh polque creían que suh ehpirituh se leh pasaba a elluh dandulih máh huerza y bigol, peru loh romanuh máh curtuh elluh, en represalia leh cuertaban lah manuh.
Peru ehemuh la ehtoría y ocupemonuh de tiempuh máh recientih, moh ehtalarun la central nucleal d´Almarah, una central qu´ebería d´abelsi puehtu en´ah probinciah máh riquinah del Ehtau, y a pesal del perigru que supusu pa Ehtremaúra, tubun la poca belguenza de no pagal su empuehtu aquí y tenel a loh puebruh a meya luh, cohtandonuh amah a loh ehtremeñuh la enelhía máh cara qu´a loh demáh ciuaanuh, una central qu´ebería ehtal cierrá pol su ehtau osoletu.
Nanay contentuh con´a antiriol, s´emprincipió la cohtrución d´otra central nucleal, en´a localiá pacensi de Baldicaballeruh, que graciah a Helipón se púu paral. Peru a loh ehtremeñuh solu hadin que metelmuh fuhca, comu el Señol Gallardu, que con´el apoyu d´Autoriaih y parti del puebru, moh metió lah aceriah y cementera, y no conhormi, moh quieri ponel la refinería qu´eh una enduhtria qu´eha muchia fuhca. Pa rematal la hugá, ehtamuh metiuh en´l bombu de la lotería y moh puei tocal un AlmacénTemporal Centralizado.
La polémica ehta selbia con esi marditu cimenteriu nucleal, la localiá cazrireña d´Álbala saliú comu candiata a su ehtalación y si no la quieri otra localiá de lah candiatah, se asiahará aquí; si ehtá bomba s´ehtala en´l norti y la refinería al sul de la rehión, puei sel la muerti d´Ehtremaúra. La Hunta moh bendiu hadi tiempu una Ehtremaúra iilica, repobla d´árbulih autohtonuh, alcornoquih, encinah y el arranqui paulatinu d´esuh árbulih depreaorih loh nogalitoh, moh prometierun y moh siguin prometiendu una enduhtria basa en´l turihmu de caliá pa combatil la crisih ( ehtu eh una barbariá ae que cohel to, el de caliá y menuh caliá ), peru no s´a siu ehcapah de ponela comu la primera huenti d´ingresuh rehionalih, a pesal de tenel materia prima pa ellu.
Una beh ehplosiona la burbuha enmobiliaria ebemuh deprendel del ladrillu, no cael en enduhtriah de riehgu y iputecalmuh con subecionih qu´a la longa solu tray retrocesu, Ehtremaúra eh una bieha rehión carga d´ehtoria qu´ahtau siempri abandoná, peru qu´a partil de la emplantación de la demucracia, ebí siguil su caminu com´un hobin paíh, hormal a lah suh hentih y cohtruil una enduhtria sohtenibli comu, enelhiah limpiah, turihmu y la traholmación de suh prouhtuh.Tamién ae que tomal en cuenta la reación y güenuh ehempluh comu: la dimisión del Alcaldi d´Álbala y la oposición de toh loh partiuh pulitícuh a la ehtalación del ATC, Ehtremaúra se lo mereci.
Biembenio
SAN HORHE
Eh dihnu d´ahmiral comu una ciua comu Cázrih, con el pasal de loh tiempuh y a pesal de lah contradihtoriah corrientih traholmaorah, aun conselba suh traiciónih. Dence hadi tiempu ehtá en marcha un mobimientu, entri el cambiu y farrungamientu de muehtrah traiciónih, y que con´a llamá ennobación de la fiehta de San Horhi, s´ehmenció con´a traholmación del dragón, qu´al final no enllegaremuh a sabel si se trata d´un dragón u se trata d´un dinosauriu y aora ehtamuh enliauh con moruh y crihtianuh.
En ehtuh díah s´a afirmau, que se tieni que renobal y qu´abra solpresah en´a prósima fíehta del patrón; al final se hará el abrazu de curturah en detrimentu de la traición de la fiehta. Lah traiciónih no s´ebín renobal, si se quieri moelnihmu s´ebí hadil a partil de loh tiempuh ahtualih, creandu nuebuh fehtehuh peru no renobandu lo ehtoricu u máh u menuh carrucu.
Imahinemuh que lah “ corróbrah d´entruehuh “ de la alquería hurdana del Cahtillu, lah “ carantoñah “ d´Aceuchi, el “ harrampla “ de Piornal y loh carnabalih de Montanchih, leh colocamuh esuh trahih ehtrafalariuh de loh carnabalih de Baaho y de Nabalmoral de la Mata, polque moh paecin que son mu carrucuh y ae que renobal-luh; que pasaría, poh que perderían to su sabol traicional.
Pol lo tantu la Audiencia y l´Asociación Curtural San Horhe, ebín pol el bien de muehtrah traiciónih, protehel, homental y conselbal la traicional fiehta de San Horhe, pol sel la máh representatiba de muehtra ciua, pa que no ocurra comu con el carnabal meyebal y que a la güelta d´unuh añuh desapaeza.
Biembenio.
ARRICOHIENDU LAH RAICIH
En ehtuh tiempinuh en qu´el árbo Luengüíhticu d´Ehtremaúra s´enhalla en un ehtau agonizanti, entabía quean angunuh ehtremuh de lah raicih d´ehti árbo que se resihtin a cahcal, asína comu angunuh locuh que s´enhallan arricohiendu lah raicih.
Hadi un tiempinu me enhalle con Luis Miguel Flores animaol sociocurtural de la Audiencia de Zorita, el que m´enformu de que en´a localia se palraba entabía muehtra Luenga, hadienduli sabel que me concertara una entrebihta con angun bidinu pa grabalu y a la beh comprebal el grau en que s´enhallaba. Luis Miguel en apelli de Charo encarga de loh pisuh tutelauh onde resiin bariuh carrucuh, me hidierun el encargu grabal a la Seña Filomena, de 90 añuh y natural de Zorita, peru qu´ahtau la meta de su bía en Cataluña y qu´a pesal de su güena disposición y colaboración, queamuh un poquinu cuertainuh al comprebal qu´a perdiu el bocabulariu ehtremeñu, peru no asina el tón.
El grupu, hormau pol Ismael Carmona comu embehtigaol, Bienvenido Gutierro y Juan Francisco comu colaboraorih del antiriol, se demoralizu un poquinu con´a grabación hecha a la Seña Filumena, peru el cielu se leh abriu cuandu apaeciu en ecena Juan Manuel Carballo Campos ( Tio Mico ), un ombri mayol, sanu, sin complehuh pa grabali, eh idil un ehtremeñu de loh pieh a la caeza y con amol a la su palra, ehti señol moh hidu subil parriba unuh ahinuh d´alegria al ehcuchali con´a naturalia que prenunciaba la muehtra palra, en un puntu tan abanzau de la hografia hacia el sul de la probincia de Cazrih y tan alehau del troncu d´esi árbo luengüíhticu que s´enhalla arrinconainu tan al norti.
Pol lo tantu dal lah graciah a Luis Miguel Chico, Charo, a la Seña Filumena y a Juan Manuel Caballero ( Tio Mico ), y sobri to a Ismael Carmona por su esitu en´a grabación, embehtigación, ehtuyu, traución y efensa de la muehtra Luenga.
Biembenio.
FERIA DEL LIBRU
Añu trah añu se bieni celebrandu en´a ciua de Cázrih la feria del libru, y no pueu pol menuh que llebalmi ca añu una gran desilusión, al no enhallal en´oh entanh de la mehma libruh ehcribiuh en Luenga Ehtremeña. Toh loh amantih del Ehtremeñu, ehcribiorih, embehtigaorih y lehtorih, sabemuh del ehtau en que se enhalla y que si no hademuh plontu argu entri toh, queará com´una luenga fosiliza y archiba en´ah bibliotecah.
Dece hadi unuh añuh, s´oselba la halta de pubricacionih, charlah y conferenciah sobri el Habla. Yo animu a loh ehcribiorih a que homentin, debulguen la Luenga Ehtremeña y no s´ehcuendan en esi meyu anónimu llamau Interneh. Ehta candenciosa, ermosa y bella Luenga, no se mereci queal, anquilosa, ocurta y en museuh, cuandu eh quería pol la mayoría del puebru ehtremeñu, a pesal de suh muchiuh enemiguh. Pol lo tantu dece mi chiquinina aportación a su debulgación y homentu a trabéh de la Asociación Cultural Pablo Gonzálvez, embitu a toh loh ehcribiorih de muehtra Luenga, a que hagan un ehuerzu pol meyu de la ehcribiura y traucionih, se saqui a la calli y que en´ah próxima feriah del libru de Cázrih, aya toa crasi de héneruh literariuh, ondi loh amantih del Ehtremeñu poamuh enhallal lah pubricacionih que sacien muehtrah neseciaih luengüíhticah de leel en muehtra Luenga Materna.
Biembenio.
EHAL EN PAH A EHTREMAÚRA
Con´a muerti del úrtimu autol del sucesu ocurriu hadi bariuh añuh en´a localia pacensi de Puertu Hurracu, an güeltu otra beh a sacal a la palehtra esa mardita frasi que tantu pesa en´oh bidinuh d´esa localia, y que tantu dañu a hechu a Ehtremaúra la España profunda. M´a dau muchia pena que meyuh de comunicación ehtremeñuh ayan acompañau en ehtá farsa con ehtensuh reportahih sobri ehti casu dihpueh de tantuh añuh d´abel ocurriu.
A siu belgüenzosu, qu´un meyu de comunicación del Estado Español como R T V E (cuyo presidente para más inri es el extremeño Alberto Oliat), haga un reportahi comu el que hidu en el pograma Comandu Ahtualia, que s´emitió el Miercolih 22-04-10 a lah 23´45 orah, onde la reportera abusu enformatibaenti en bariah ocasionih de loh bidinuh entrebihtauh. Ehti hue un hechu dehraciau y orrendu, qu´oy ocurrin en cualquil palti d´Ehpaña.
Loh ehtremeñuh que hadi tiempu ehtubimuh huera d´Ehtremaúra, tubimuh qu´aguantal no la dehcriminación peru si la mofa al idil qu´erah ehtremeñu, tubiendu que salil muchiah bedih a efendel a la muehtra tierrina, poh siempri te sacaban a reludil el tema de lah Hurdi idiendoti qu´era una zona mu atrasa, y musotruh l´embitabamuh a que hueran y comprebasin con´oh suh propiuh ohinuh comu era la belleza d´esa palti d´Ehtremaúra que son lah Hurdi.
Oy Ehtremaúra drentu de su atrasu con rehpehtu al retu d´Ehpaña, eh un Paíh qu´apesal de lah enolmih trabah qu´empien su plenu desarrollu, tieni un timiu realci en su traholmación socioécunomica. A pesal de lo antiriol, tamién tenemuh muchiah cosinah güenah comu: güen clima, una natura de lah mehorih d´Ehpaña, un patrimoñiu curtural ececional, un Paíh pribilehiau pa bibil pol su natura bilhin y pol su calia de bía. Pol lo tantu ae qu´enformal con moeración y esuh meyuh que debulgan tanta basura y tienin esa holma tan depreaora d´enformal eberían, ehal en pah a Ehtremaúra.
Biembenio.
EL CUBU COLMENERU
Cazrih ya tíini ganáu el 2016 a trabéh del patrimoñu curtural qu´encierra la cerca drentu de lah suh parelih (ojala que lo gane ), m´acuerdu cuandu era un dagal, lah hentih de loh puebruh se mofaban polque idían que sólu tinía pierah, eh idil palaciuh i igresiah, ya qu´en esuh tiempuh y en una socieá rural comu la ehtremeña, sólu se le daba balol a la agricurtura y ganaería.
Anti la encapaciá de loh dirihentih pulíticuh p´atrael empresariuh qu´asientin negociuh en su solal, se puei dal lah graciah a esi patrimoñu de peñahcuh, que pol ciertu ehti añu ehtá siendu un ésitu l´afluencia de turihtah qu´an besitáu la ciá, a pesal de lo mal bendía qu´ehtá ahuera.
El huturu de Cazrih ehtá en su cahcu ehtóricu, ya lo ihi anguna beh; polo qu´ay que conserbalu entahtu comu ehtá, a palti de que se rebitalici y no se le ehi moril. Ehtuh díah, s´a retiráu el burka que cubría El cubu colmeneru (por la cantidad de ventanas y su parecido con un panal de colmenas), el edificio Atrio ubicáu en´a praza de San Mateos, qu´a ehtáu tapáu pa que no se dinguelara el desaguisáu que s´ehtaba cometiendu y emuh bíu el pahtel, un edificiu feu, que causa un enolmi empahtu bisual negatibu al ehtal encrabáu en un entornu de dehtintah cohtrucionih y antigüeá.
Ae que dehterral qu´el moelnihmu depredaol y “progre” entri en´a cerca comu elefanti pol cacharrería, polque si lo hadi ehtrozará el patrimoñu causandu el consiguienti dañu a la ciá; si se quierin hadel ehtuh edificiuh moelnihtah que ya loh ehtán hidiendu, que loh hagan peru en´oh nuebuh barriuh. El cubu, ebíu al cambiu que se hidu, an queríu maquillal-lu forrandu lah suh parelih con pierah pa no desentonal con loh edificiuh de loh alreorih, peru sigui desentonandu igual.
Biembenio.
CHAPAH D`EHTREMAÚRA
Pasauh loh sofocantih calorih del beranu, entramuh en´l otoñu, ehtación templá, trihti y melancólica, comprimia pol lah ehtacionih ehtibal y ibernal, que da comienzuh a la paralización de la sabia behetal.
En Ehtremaúra, dan comienzu loh colorih bibuh de la natura y, se ba preparandu la parda tierrina pa acohel en su senu lah primerah gotinah de agua otoñalih, que traeran bía, berdol de lah primerah plantah y si faborecin lah temperaturah, salirán lah primerah frorih antih de la llegà del ibiernu.
S´añoran aquelluh tiempuh utópicuh en que toh marchamuh huntuh ahta Gualupi, pa celebral uniuh el primel día de muehtra comunía, peru esu era demasiau luhu pa mosotruh, abía que farrungal-lu y asín dehperdigal a loh ehtremeñuh, no hueran a rebelalsi contra el poel.
Eh tiempu de reflexión, analicemuh en´ah cercaníah del Día d´Ehtremaúra y con´l la entriega de lah chapah d´Ehtremaura (Medallas de Extremadura), y que dece hace tiempu s´oserba en ehti día, la lihereza con que s´entriegan. Mahnifica idea, la de entriegarlah en bía pa difruti de suh acreeorih, peru señorih del comité d´ehpertuh, otorguenselah a lah pesonah que berdaeramenti sean acreeorah a ella, no hagan una carnabala dehbirtuandu asín ehti ahtu.
Bah´un puntu de bihta, no eberían otorgalsi con tanta premura, ya que si eh asina, eberían de otorgársela a toh loh ehtremeñuh, polque toh hacen argu pol ehta tierra. Pol lo tantu señorih ehpertuh, antih de conceel una chapa, piensin y reflesionin el meritu pa tal concesión y no lah entrieguin tan a la lihera.
Biembenio.
CORREBOUH
Cuandu Loh Celtah s´ehtablecierun en´a Penisula Iberica, entrouherun el animal máh bellu y ermosu d´Ehpaña y Ehtremaúra el toro salbahi, animal totenicu d´ehtuh puebruh, que máh taldi con su empleu en´ah fiehtah, resurtó el toro brabu. En Ehtremaúra la fiehta mah representatiba dehtuh puebruh, eh la del torinu de San Huan de Coria.
Ya en´oh tiempuh preromanuh, esuh cahtruh de Baldemoralih, Montanchih, Botiha, Torriquema, Sierrahuenti Cazrih y otruh muchuh máh, de seguru qu´el toro hormaba palti de lah suh fiehtah. Sigún la traición celtiberica de la Penísula que loh utilizó en´a efensa de suh cahtruh, siguru que loh ehcribiorih romanuh eharun bahtanti ehcribiu sobri loh puebruh, Betonih, Lusitanuh y Beturicuh d´Ehtremaúra y su relación con´oh toro.
Lo mehmu que loh celtah utilizarun a loh toro embolauh pa rompel el cercu a suh puebruh sitiauh; en Ehtremaúra se utilizarun contra loh moroh, eh el hechu acaeciu en´l Puertu de Tonabacah, ondi loh crihtianuh sortarun pol la nochi bariuh toro y bacah embolah auyentandolah puertu abahu a lo que loh moroh al bel-lah benil, salierun huyendu dehpaboriuh al gritu de (Tornan Vacas ), que bienin lah bacah, abandonandu el campu de batalla, queandu el puertu con el nombri ahtual de Tornavacas.
Ehtuh díah se palro muchu de loh correbouh o toro embolauh, que comu consecuencia de suprimilsi en Cataluña lah corriah de toro loh querían suprimil, peru graciah al puebru s´a sacau una ley pa su proteción. Loh nuebuh mesíah de la política quierin acabal con toah lah fiehtah en´ah qu´entri ehti animal; y acompañandu a ehta comparsa la Hunta d´Ehtremaúra saca una ley en´a cual proibi lah fiehtah con toro embolauh. Ae henti que to ehtu leh paeci mu bien y mu guay, peru son recortih de parcelah de libertah que moh roban a loh ciuaanuh, qu´emprincipial sabemuh ondi emprincipian, peru no sabemuh ondi aterminaran.
Biembenio.
LOCALIHTAH
Se critica a loh localihtah pol su afán identitariu, el localihmu esihti dende la épuca antigu.Ya en´a épuca prerromana se hacían figurinah d´animalih y bellotah de muehtra tierrina y, en´a dominación romana lah moneah de muehtra capital antonómica la figura de su puenti romanu. Lo peol que puei ocurril eh aplahtal, cercenal y cortal la libertah, oy graciah a Dioh, en muehtru sihtema demucráticu to lo que s´acoha a la Ley eh legal, polque que sentiu tieni legalizal un partiu, asociación o plataforma y que cuandu tengan apoyu ciuaanu idil que son unuh ehtremihtah.
Loh agoreruh que se crein ehtal en posesión de la berdah, no ebin asuhtalsi polque aya o crezan lah corrientih localihtah, rehionalihtah o endependientih, en´l fondu toh semuh un poquinu d´esu en´a bía, lo malu eh qu´ehcapih del redil. Mientrah ehtéh suhetu al ordin ehtableciu y no rebasih la línia que te tienin señala, seráh bien recibiu, palmeau y agasahau con parabienih, peru si rebasah esa línia, te tacharán de localihta qu´eh lo de menuh, sino de conselbaol, retrograu, ehtremihta i incrusu de separatihta.
Dende haci muchu tiempu ehta en marcha esi run, run d´ataquih a loh localihmuh, pol palti de loh grupuh de presión oy d´ehpertuh, siendu normal qu´el localihmu esihta debidu a la ehaeh, abandonu y mal funcionamientu de lah intitucionih.El localihmu no intenta apropialsi de na, solu eh una corrienti con afán de conserbal y protehel la ientia, patrimoñiu y curtura de loh puebruh d´Ehtremaúra, hamáh se procupa de quital el puehtu a loh famosuh ehpertuh, si no mu al contrariu siempri ehta dihpuehta a colaboral con su ehperiencia y cercanía con´a pobración y el terrenu.
Graciah al localihmu, s´a conselbau güena palti de muehtru patrimoñiu y curtura. Pol lo tantu Ehtremaúra ebi reorganizal su antonomía, ahondal su autogobiernu y sel un paíh seriu; protehiendu lo ehtremeñu y, en cuantu a la ientia no la tieni que arrebuhcal, ya la tieni mucha y mu añeha.
Biembenio.
DEHPERSONALIZACIÓN EHTREMEÑA
Pa comprendel el fenómenu qu´amenaza dende siempri a Ehtremaúra, eh nesezariu partil d´una basi concreta y l´asoluta dehpersonalización en qu´oy s´encuentra el puebru ehtremeñu.
Sel entremeñu, en ehtuh momentuh, no sinifica entegralsi en una huerti corrienti d´opinión, perfetamenti soliaria de si mehma; que conoza cuálih son suh necesiaih y rebindique lah solución a lah suh esihenciah.Sentilsi ehtremeñu eh ehtal solu, en meyu d´un puebru d´emigrantih, y tenel qu´asumil la incompresión, cuandu no el dehpreciu, de loh puebruh máh pribilehiauh del ehtau.
Pol otra palti,esihtin pocah organizaciónih puliticah ehpecificaenti ehtremeñihtah, a ececión de doh pequeñah organizaciónih rehionalihtah, lah cualih difundin un ideariu de soliaria entri loh ehtremeñuh ( ignoradas por los extremeños ), tapocu ae beiculoh d´información, prensa, arrayu, telibisión, propiamenti ehtremeñuh que puean trahmitil la idea conhunta d´Ehtremaúra. Loh ehtremeñuh, separauh, no consiguiremuh na; peru uniuh sí: polque cuandu el pensamientu de lah mucheumbrih eh unanime sobri cualquiel asuntu, se combierti en una entíah ahtrahta llama opinión púbrica a la que naide s´atrebi a desafial.
Biembenio.
